WAISLAM WAJA JUU KUHUSU KADHI NA MAASKOFU

VIONGOZI wa dini ya Kiislamu wamepinga tamko lililotolewa na Jukwaa la Wakristo kuhusu sheria hiyo ya kuanzishwa Mahakama ya Kadhi na kudai kuwa matamko ya aina hiyo yanaweza kusababisha machafuko nchini.Kauli hiyo zimekuja siku moja baada ya Jukwaa la Wakristo Tanzania (TCF) kutoa waraka, likipinga muswada unaopendekeza kuanzishwa Mahakama ya Kadhi unaotarajiwa kuwasilishwa bungeni wakati wowote.Akizungumza na Chanzo chetu  Imamu wa Msikiti wa Idrisa uliopo Kariakoo, jijini Dar es Salaam, Sheikh Ally Basalehe alisema viongozi wa dini ya Kikristo mara nyingi wamekuwa wakipinga masuala mbalimbali yanayogusa Uislamu yakiwamo yale mazuri.Alisema mwenendo wa kupinga masuala ya kidini sio mzuri, kwani Waislamu hawajatamka kuwa sheria za dini hiyo zitawale nchini isipokuwa mahakama hiyo itajali masuala muhimu yakiwamo ya ndoa na mirathi Kwa upande wake Msemaji wa Jumuiya na Taasisi za Kiislamu Tanzania, Sheikh Rajabu Katimba, alikiambia Chanzo chetu kwa njia ya simu jana kuwa kwa Waislamu Mahakama ya Kadhi ni ibada kama ibada nyingine, na haipaswi kupingwa na chombo kingine cha dini kutokana na umuhimu wake.“Tunawashangaa viongozi wa dini ya Kikristo kusema suala hili ni la kibaguzi, mbona Serikali imeingia mkataba na hospitali za makanisa mwaka 1992 na wanapewa mabilioni ya fedha za kodi za Watanzania wakiwamo Waislamu sisi hatujawahi kuhoji wala kulalamika?” alihoji Sheikh Katimba.